Ermənistan XİN-i vurduq?

Erməni mətbuatı Ermənistanın Xarici İşlər Nazirliyini sərt tənqid ediblər. ANS PRESS "Jamanak" qəzetinə istinadən xəbər verir ki, qəzet erməni helikopterin Azərbaycan mövqelərinə hücumu zamanı vurulmasından 6 gün keçməsinə baxmayaraq Ermənistan XİN-in hər hansı bir bəyanat verməməsindən hiddələnib. "Elə bil ki, azərbaycanlılar helikopteri deyil, XİN-i vurub. Bu qurum öz bəyanatları, təşəbbüsü, çıxışları ilə hamıdan seçilməli idi. Ancaq onlar susaraq oturub belə bir biabırçı və ümidsiz vəziyyətin yaranmasına səbəb olub. Ermənistan XİN-in susması heyrət doğurur", - "Jamanak" yazır. Qeyd edək ki, Azərbaycan Müdafiə Nazirliyinin mətbuat xidmətindən verilən məlumata görə, davamlı olaraq mövqelərimiz üzərində döyüş manevrləri yerinə yetirən düşmən hərbi aviasiyası noyabrın 12-də daha açıq şəkildə döyüş kursuna çıxaraq uçuşlar keçirməklə mövqelərimizə atəş açmağa cəhd edib. Saat 13:45 radələrində cəbhənin Ağdam rayonunun Kəngərli kəndindən 1700 metr şimal-şərq istiqamətində Ermənistan Respublikası Silahlı Qüvvələrinə məxsus Mi-24 tipli helikopteri döyüş kursuna enərək mövqelərimizə hücum edib. Qoşunlarımız tərəfindən açılan cavab atəşi nəticəsində düşmən helikopterlərində biri məhv edilib, digəri isə uzaqlaşıb. Helikopterin vurulması nəticəsində 3 pilot ölüb.