Ərdogan bildirib ki, onun ölkəsi Avropa Birliyinə daxil olmaq marağını itirib
Türkiyə prezidenti Rəcəb Tayyip Ərdogan bildirib ki, onun ölkəsi Avropa Birliyinə daxil olmaq marağını itirib.
O keçirdiyi mətbuat konfransında o bəyan edib ki, əgər Avropa Birliyi Türkiyəni öz üzvü kimi görməyə razılaşsa, Türkiyə “yox” deməyəcək: “Amma əgər siz hələ də Türkiyənin Avropa Birliyinin qapısını döydüyünü düşünürsünüzsə, bu belə deyil. Türkiyə heç kimə yalvarmaq fikrində deyil. Əgər qəbul etməsələr, biz özümüzə başqa yol seçərik”. Ərdogan onu da deyib ki, Türkiyə hazırda Avropa Birliyinin dəyərlərini götür-qoy edir. Aydınlaşdırmaq istəyir ki, Avropa Birliyi demokratik sistemdir, yoxsa xristian klubu.
Dekabrın ortalarında Ərdogan Avropa Birliyini sərt tənqid etmişdi. O zaman “antimilli qüvvələr"lə əlaqədə şübhəli bilinən 20-dək şəxsin, o cümlədən jurnalistin həbsini pisləyən Avropa Birliyini tənqid edən prezident demişdi ki, heç kəs Türkiyəyə demokratiya dərsi keçməməlidir:
“Türkiyə özü avropalılara demokratiya dərsi keçməyə qadirdir”. Türkiyənin Avropa Birliyinə qəbulu ilə bağlı danışıqlar 2005-ci ildə başlanıb.
Amma Brüssel ilə Ankara arasında Kipr məsələsi ilə bağlı ciddi fikir ayrılıqları qalmaqdadır. Bundan başqa bəzi avropalı siyasətçilər Türkiyədə demokratiyanın vəziyyətini, bəziləri isə Türkiyədə siyasi İslamın güclənməsini əsas gətirib Ankara ilə danışıqların qısa zamanda yekunlaşdırılmasını istəmirlər.
